Sekretariat   Sekretariat

Presse / Medien   Presse / Medien

Webmaster   Webmaster

 

Euler im Fasnachtshimmel

Querschleeger-Ladärne Fasnacht 2008

Leonhard Euler ist es gegen Ende seines 301. Lebensjahres noch gelungen, den ultimativen Gipfel des Basler Ruhmes zu erklimmen und zum Fasnachtssujet zu werden.

Die Fasnachtsgesellschaft d'Querschleeger bedachte das Eulerjahr mit einer wunderschönen Ladärne und einem Zeedel mit folgendem Text:

Wär hetts erfunde?

Nyyn Nyyner-Quadraat - und dasch s'Geniale
in jedem Quadraat die glyyche nyyn Zaale
au waagrächt und sänggrächt, s'isch kai Spleen
driffts noonemool die glyyche Nyyn
Alli Nyyn ? das losst ys nit in Rueh
hett das emänd mit Kaigle z'due ?
Dumms Zyyg: SUDOKU haisst dä Tigg
und mathematisch Zaubertrigg!

SUDOKU spiilt jede Stänz, jedes Dissi
im Liige, im Stoo, au uf dr Schissi
au jedes Buschi duet scho jetze
syni Baukletz sudokisch zämmesetze
SUDOKU bym Glette machts au mi Frau
SUDOKU im Stau und ohni Stau au
SUDOKU im Dram, trotz Kurve-Gequietsch
SUDOKU bym Kiffe am Flora-Beach
SUDOKU im Mathematikunterricht
so gail wie-ne Harry-Potter-Gschicht
Und im Roothuus die Siebe - s'goot der an d'Niere
spiile-n-au SUDOKU - statt z' regiere...

Drum froggt me sich langsam - wäreliwäar
hett das ächtsch erfände - wo kunnt das au häär ?
Drby, und jetz loosed emool aa
kunnts jo schynts diräggt uss Amerika
nur dr Busch kunnt nit druss - und findets e Mischt
drhinter steggt sicher e Terrorischt
drum hett mes dört allwäg nit akzeptiert
und wytter no Japan transferiert
s'kunnt jo sunscht fascht alles, wo-n-e weeneli gspunne
uss em Land, wo si uffgoot, unseri Sunne
Aber Japan und au d'USA
miens vyllicht au no vo naimen anderscht ha
und wirgglig - dr Ursprung foot friehner aa
nämmlig bymene supergschiide Maa

Vor 300 Joor do z'Basel am Rhy
kunnt uf d'Wält dr Euler - e Mega-Genie
uffgwaggse isch er denn zwoor glaub in Rieche
öbbis muesch-ne au loo, däänen arme Sieche
mainsch, was die ohni Basier IQ mieche !?
S' ABC wie mir - und s'Aimool-Ains
losst dr Euler grad uss, dä bruucht e kains...
Mit vier syg er im Hiehnerstall - me haig drab kenne lache
uff d'Aier ghoggt und haigi welle Giggeli mache
wenn das speeter sy Methode gsy isch, erstuunts nit minder
dass me vernoo het, är haig drizää Kinder...
Als Pfarrersohn zerscht by dr Theologie
vo dr Astrologie yber d' Philosophie
und yber d'Physik zur Biologie
nur in d'Zoologie seht er weniger dry
sunscht yberall drby, aber gly
isch bald nyt mee halber so schigg
fyr ihn, wie die hoochi Mathematik.
Uns macht elläi sch s'Wurzle zieh
als bym Zahnarzt schandbar Mieh
unsren Euler stöört das nit
dä finde s'Wurzle zieh e Hit.
Ob naime d'Alinghi duur s'Wasser schiesst
irgendebbis Nejs zur Aerden uss spriesst
dr Fäderer en As platziert
und si Gegner d'Fääler multipliziert
d'Nyynerproob glatt ufe Ranze fliegt
und e Dreisatz lengschtens nimme gniegt
by alldämm kasch immer sicher si
isch irgendebbis vom Euler derby
denn vom Berächne vomene Himmelbett
bis zum Däteverkeer uf em Internet
bruchts ebbis vom Euler, jedi Wett!
denn so ain wie dr Euler muess kaine wegge
nur was es nit git, ka dä nit entdegge.

Dr Barbara Schneider fäält sone Genie
im Berächne vo ihrer Geothermie
bym Baudepp gitts hald kai so schnälle
wie dr Euler, wo Druck- und Boodewälle
im Voruss bestimmt hät - mit Garantie
nit wie d'Barhara - immer erscht hindedri...
So entwigglet dr Euler zwoor z'Basel vyyl Schwung
aber fyr e Uni-Lehrstuehl syg er hald z'jung
und so bassierts au ihm - wie hitt no bekannt
Z'Basel giltsch als Prophet nyt im aigene Land
so macht hald dr Euler si Stuehlgang im Oschte
und duet dä Lehrstuehl in Petersburg boschte
Au dert blybt dr Euler am Ball - yberall
Zälldailig und radioaktive Verfall
Logaritme, Ballistik - denn pletzlig: e Knall !
by uns wär's verbotte - s'isch am näggschte Tattoo
au dr glainschti Frauefurz sicher tabu
Zrugg zum Euler - är het Basel verloo
und isch dernoo au nimm ummekoo
aber sogar mit syne dreihundert Joor
das mien-d-er glaube, s'isch wirgglig woor
wär er au hitt no nit halb so mied
wie mit 175 Joor - s'Baselbiet...
SUDOKU und Euler - das wird verbunde
aber hett er's wirgglig als erschte gfunde ?
By syyne latiinische Quadraat
goots mathematisch akurat
um sone-n-Art vo Zaale-Korsett
wo sich denn zum SUDOKU gwandlet hett
nur so Quadraat, duet me speeter vernää
haigs scho im nyynte Joorhundert gää
är haig heggschtens dra ummepigglet
und da Schmätter wytter-entwigglet

Euler hi - SUDOKU här
mir nämme s'Lääbe nit so schwär
vyllicht het jo au in ainsame Stunde
sone Färnsee-Pfahlbauer das alles erfunde
Uns jedefalls machts kaini Quale
wär das Spiil mit dääne Zaale
erfunde hett, das geniale
fyr uns isch s'ainzig ideale
dass mer e Süschee hänn zum lache
und das mer derfe Fasnacht mache !

Direkte Anwahl:

  1. Agenda
  2. Newsletter
  3. Kontakt
  4. Links

Newsletter

AKTUELL Der 6. Newsletter ist am 16. Juni 2008 erschienen. Lesen ...

Schlussbericht

Im April 2008 ist der Schlussbericht über die Basler Aktivitäten zum 300. Geburtstag von Leonhard Euler erschienen. Zum Bericht ...

Fasnacht 2008

Leonhard Euler ist es gegen Ende seines 301. Lebensjahres gelungen, den ultimativen Gipfel des Basler Ruhmes zu erklimmen. Mehr ...

Jahreskongress SCNAT

Zum Abschluss des SCNAT-Kongresses: das Impulsreferat von Prof. Jürgen Mittelstrass und die Pressemitteilung zum Symposium "Exzellenz was fördert und was hindert sie?". Zum Download ...

 

 
Valid XHTML 1.0 Transitional Valid CSS!
v1.2.07/de